အရှင်ဘဒ္ဒိယသည် သာကီဝင်မင်းသားတစ်ဦးဖြစ်ခဲ့၏။ ထီးနန်းစည်းစိမ် အလုံးစုံကို စွန့်လွှတ်၍ ရဟန်းပြုသူ ဖြစ်လေသည်။
ထို အရှင်ဘဒ္ဒိယသည် တောအုပ်၊ သစ်ပင်ရင်းတို့၌ တစ်ပါးတည်း နေလေ့ရှိ၏။ " ဪ-ချမ်းသာပေစွာ့၊ ချမ်းသာပေစွာ့" ဟုကျူးရင့်လေ့ရှိ၏။
ယင်းကဲ့သို့ အရှင်ဘဒ္ဒိယ ကျူးရင့်သည်ကို အခြားသော ရဟန်းများ ကြားရလေသည်။ ထိုအခါ ရဟန်းများသည် " ဤ အရှင်ဘဒ္ဒိယသည် အကျင့်မြတ်ကို မမွေ့လျော်ဘဲနှင့် ' ဪ-ချမ်းသာပေစွာ့၊ ချမ်းသာပေစွ' ဟုကျူးရင့်ခြင်းသာ ဖြစ်ပေမည်၊ လူ့ဘ၀တုန်းက ခံစားခဲ့ရသော ထီးနန်းစည်းစိမ်ကို အောက်မေ့ပြီး ကျူးရင့်ခြင်း ဖြစ်ပေလိမ့်မည်" ဟု တွေးထင်မိကြကုန်၏။
ထို့ကြောင့် ရဟန်းတို့သည် အနုပိယမြို့၊ သရက်တော၌ သီတင်းသုံးနေတော်မူသော မြတ်စွာဘုရားအား အရှင်ဘဒ္ဒိယ အကြောင်းကို လျှောက်ထားကြလေ၏။
မြတ်စွာဘုရားသည် အရှင်ဘဒ္ဒိယကို ခေါ်စေ၍ မေးတော်မူ၏။
" ဘဒ္ဒိယ-သင်သည် ဆိတ်ငြိမ်ရာ၌ တစ်ယောက်တည်းနေလျက် ' ဪ-ချမ်းသာပေစွာ့၊ ချမ်းသာပေစွာ့ ' ဟူ၍ ကျူးရင့်လေ့ ရှိသည်ဟု ကြားရသည်မှာ မှန်သလား"
" အရှင်ဘုရား-ဤအတိုင်းမှန်ပါသည်" ဟု အရှင်ဘဒ္ဒိယ က၀န်ခံ လျှောက်ကြား၏။
" ဘဒ္ဒိယ-သင်သည် အဘယ်အကြောင်းကို သိမြင်၍ ကျူးရင့်လေသနည်း"
" အရှင်ဘုရား-တပည့်တော်သည် ရှေးလူဖြစ်စဉ် အခါတုန်းက နန်းတွင်း နန်းပြင် အစောင့်အရှောက် ချထားပါ၏၊ မြို.၊ ရွာ၊ နိဂုံး၊ ဇနပုဒ် တို့၌လည်း အစောင့်အရှောက်ကို ကောင်းစွာစီရင်၍ ထားပါ၏၊ အရှင်ဘုရား-ဤသို့ လုံခြုမူကို စီရင်ထားပါသော်လည်း တပည့်တော်သည် ကြောက်ရွံ့ စိုးရိမ်လျက်သာပင် နေခဲ့ရပါ၏၊ အိပ်ခဲ့ရပါ၏။ အရှင်ဘုရား-တပည့်တော်သည် ယခုအခါ၌မူကား တစ်ယောက်တည်း ဆိတ်ငြိမ်ရာ၌ နေရသော်လည်း မကြောက်ရွံ့ မစိုးရိမ်ရတော့ပါ၊ ထို့ကြောင့် ' ဪ-ချမ်းသာပေစွာ့၊ ချမ်းသာပေစွာ့' ဟုကျူးရင့်ခြင်း ဖြစ်ပါသည်" လျှောက်ထားလေ၏။
ထိုအခါ မြတ်စွာဘုရားသည်-" အကြင်ပုဂ္ဂိုလ်၏ အတွင်းစိတ်၌ အမျက်ဒေါသတို့သည် မရှိကုန်၊ ဤသို့ပြည့်စုံခြင်း ပျက်စီးခြင်းကိုလည်း လွန်မြောက်၏၊ ဘေးကင်း၍ ချမ်းသာသော ကြောငြ့်ကကင်းသော ထိုပုဂ္ဂိုလ်ကို နတ်တို့သည်ပင် မြင်ရန် မစွမ်းနိုင်တကား" ဟု ဥဒါန်းကျူးရင့်တော်မူလေ၏။
(စာရေးသူ=လေးမြိုင် စာအုပ်အမည်=ဗုဒ္ဓ၏ ၀ါဒစစ်ပွဲများ)
Subscribe to:
Post Comments (Atom)
No comments:
Post a Comment